Luke 23

1E mui a faxuvulan ina rabuna aave ri tamasiak e ri lisan na Yesus xe si Pailat. 2Ri gel tifie e ri kuus, “Maam texaas o a mataa aanabe' i taxa yuuf a mu rabuna simaam. Nane xuus nari o ri muta mamareiai xe si Sisaa e nane kuus o nane ve a Mataa Failai e a piran.”

3E voxo na Pailat a fin na Yesus, “Nano, no piran sina mu Juda, bo?”

E na Yesus a suie, “Aang, a malaan sena ferawaian siim.”

4E mui na Pailat a xuus a mu paamua priis e malila, “Ne pife tingin ta saxa mo xena pisaana mataa aanabe'.”

5Taasaxa, ri kuus fulaa, “Nane taxa vil faraak a rabuna lana maana nobina pe Judia pana fepitaian sina. Nane tangpat pe Galili e naboxo a savat iau.”

6Layaan na Pailat a langai a mo aanabe' nane fiai tamo a mataa aave ti Galili. 7E layaan nane langai o na Yesus a filimaan ti la fatataganan si Herot, nane feng na Yesus xe si Herot aava taxa waan pe Jerusalem la yaan aapave.

8Layaan na Herot a xalum na Yesus nane faamamaas paaliu senaso la maana yaan xaves nane vubuk xalume. Na Herot fo langai a maana mo se Yesus e nane buk xalume i taa vil a mo fa'ipul. 9Nane fin na Yesus pana fiaian xaves taasaxa na Yesus a pife suie. 10A mu paamua priis e mu rabuna ina fepitaa pana vuputkai ri taxa tigina pave e ri gel tifi faagutane. 11E mui na Herot e mu rabuna ina fevis, ri suaxan na Yesus. Ri fafalaxe pana marapi ina piran e ri feng fa'ulie xe si Pailat. 12Lana yaan aapave xo, na Herot nare Pailat re fesing fa'ulaa senaso paamuina mo aanabe' re fuuna femaraleiai.

13Na Pailat a xel faxuvul a mu paamua priis, mu matalava e mu rabuna 14e a xuus nari, “Mi lisanmaan a mataa aanabe' e mi kuus o nane taxa yuuf a mu rabuna. Nenia, ne fine pana maana fiaian xaves la matami e ne pife tingin ta mo xena pisaana. 15E na Herot vaxa malaan, senaso nane feng fa'uli a mataa aanabe' xe sitaara. A matavas o na Yesus a pife vil ta mo xena punuxaana. 16E voxo ne taa sipe e mui ne taa mulus tapine.” 17[Na Pailat a toxan a toxolan xena mulus tapinaana mataa la fenamo ina Paaliuan.]

18Pana ling saxa a malila ri xukulai, “Siak tapin a mataa aanabe' e punuxe e mulus tapin na Baraabas xe simaam!” 19(Na Baraabas a vipis sena fevisan e ngaapunuk.)

20Na Pailat a vubuk rao i taa mulus tapin na Yesus e nane ferawai fulaa. 21Taasaxa ri taxa xukulai lunai, “Niil fataxutane, niil fataxutane.”

22A fatalatulaana yaan nane ferawai xe siri, “Xenaso? Nane fo vil a so ta vilaana saat? Ne pife tingin ta mo xena punuxaana. E voxo ne taa sipe mon e ne taa mulus tapine.”

23Taasaxa, pana xukulaian molava ri kuus faagut o i taa niil fataxutanan. E a xukulaian siri a molava temasaat sena ferawaian si Pailat. 24E voxo na Pailat a lamon o i taa tavai nari pana vubuxanan siri. 25Nane mulus tapin a saxa aava waan la vipis sena fevisan e ngaapunuk, a saxa aava ri vubuxane e nane tavai nari pa Yesus xena faxa'usi a lamonan siri.

Ri Niil Fataxutan Na Yesus

Mt 27:33-44; Mk 15:22-32; Jn 19:17-24

26Ri taxa paamuian et na Yesus e ri fe saxam na Simon ti Sairiin aava filimaan ti la bina ina uma e ri timin a bolo si Yesus la mina xena yaasaana. E nane usi na Yesus pana. 27A malila ri usie e la palou iri a toxan a saxano lutefin aava ri muluk na Yesus. 28Na Yesus a gilim xe siri e a kuus, “Lutefin ti Jerusalem, muta muluxau taasaxa muluk nami xa e mu rafulak simi. 29Senaso a yaan saat taa savat layaan a rabuna ri taa kuus, ‘A lutefin aava ri pi luluk o pi fasus ta lak, ri taa faamamaas.’ 30E mui lana yaan saat naang a rabuna ri taa kuus xe sina mu put, ‘Poxoi nemaam’ e xe sina put modak ‘xafut nemaam.’ 31Senaso tamo rabuna ri taa vil a mo mosaat xe siak a so ta mo ri taa vile xe simi?”

32Ri lisanmaan vaxa a rovaat ina fenau xena punuxaan nare xuvul pa Yesus. 33Layaan ri savat la bina aava ri xalie pana veng, ri niil fataxutan na Yesus xuluna bolo e a ro mataa saat la nu itina, saxa la pamuaan e saxa la paxaiya. 34E na Yesus a kuus, “Tamaang, lamon tapin a vilaana saat siri senaso ri vungut sena so ta mo ri taxa vile.” Saxano rabuna ina fevisan ri tapin a faat xena siak a marapi si Yesus.

35Maana rabuna ri taxa ti falime. E a mu paamua ri suaxane e ri kuus, “Nane fakaxup a xasanofuna, tamo nane a Mataa Failai, a saxa aava Piran fo bure, naak nane taa fakaxup fatak nane xa.”

36A mu rabuna ina fevis, ri tavaie pana wain mopaak xena num. E ri filimaan faasilak xena suaxane e ri kuus, 37“Tamo nano, no piran sina mu Juda fakaxup fatak nano xa.”

38A toxan a lagasai laa'ui xuluna bolo aava kuus, “Nabe' ve a piran sina mu Juda.”

39A saxa mataa saat a kuus pengan a isina Piran e a kuus, “Nano, no Mataa Failai, bo? Fakaxup fatak nano xa e nemaame sait.”

40Taasaxa xasa mataa saat a barase, “Nano, no pife mataut sena Piran, bo? A fakasanaman siim a fexaxaas sena fakasanaman si Yesus. 41Ri vil fakasanam netaare senaso taare vil a maana mo mosaat. Taasaxa mataa aanabe' a pife vil ta mo mosaat.”

42E mui nane kuus, “Yesus, layaan no siak a vepen ina piran siim, lamon fa'uliau.”

43E na Yesus a suie, “Ne xuus tuunei nano, tanin mon no taa waan xuvul paga la bina roxo, Paradais.”

A Maatan Si Yesus

Mt 27:45-56; Mk 15:33-41

44A faasilak la belo la paanaas e a malang ina ngaas a malit e a bina fe suk fefexaxaas leaaf. 45A marapi aava fuuna tofai lana tang lifu lotu a tiririk la palou ina ti laa'ui xe lapia. 46E na Yesus a xukulai faagut, “Tamaang, ne tavai nano pana vovau iga.” Nane ferawai malaan e a maat.

47A saxa paamua sina rabuna ina fevisan a xalum a maana mo ri fo savat e a kuus fararoxo xe sina Piran e a kuus, “A tuuna paaliu, a mataa aanabe' a mataa xaradak.” 48Layaan a rabuna aava ri faxuvul xena falime, ri xalum a so ta mo fo savat, ri ulaa xe la lifu siri pana matafanan molava. 49Taasaxa lutefin aava ri usi na Yesus ti Galili, xuvul pana xasano fesing fulaa sina, ri tigina lasuun famodak e ri falim a maana mo aanabe'.

A Xaafanaan Na Yesus

Mt 27:57-61; Mk 15:42-47; Jn 19:38-42

50A saxa mataa, isina na Yosep, a filimaan ti la saxa bina lana Judia ri xalie pa Erimatia. Nane a mataa pana vilaana roxo aava rabuna ri suai sena. E nane taxa waan bang a savatan ina fatataganan sina Piran. Nane waan la palou ina mu paamua sina mu Juda taasaxa nane pife turoxo pana lamonan e vilaana siri. 52Nane falet xe si Pailat e fe fine pana mamaat i Yesus. 53E mui nane siak faduie e pise pana marapi fa'ui e famatie lana liing aava ri taxe lana faat. A nobina aanabe' a fa'ui paaliu e ri pife timin a saxa mamaat lana lunai. 54A yaan aanabe' a yaan ina faigotan a maana mo xena Yaan ina Fangaafusan aava i taa tangpat faasilak.

55A lutefin aava ri fo usi na Yesus ti Galili, ri usi na Yosep e ri xalum a liing ina mamaat e malaafaa nane famati a mamaat i Yesus lana. 56E mui ri falet xe la lifu siri xena faigotan a mo lalas ina xaxaafai. Ri usi a vuputkai siri e lana Yaan ina Fangaafusan aave ri nai palau mon.